Tuesday, October 12, 2010

ದೇವಾಲಯದ ಬೇಗ ಮುರಿದು ಹುಂಡಿಯಲ್ಲಿದ್ದ ಹಣ ಕಳವು

  • ದೇವಾಲಯದ ಬಾಗಿಲು ಮುರಿದು ಹುಂಡಿಯಲ್ಲಿದ್ದ ಹಣ ಕಳವು ಮಾಡಿದ ಘಟನೆ ಸೋಮವಾರಪೇಟೆ ಠಾಣಾ ವ್ಯಾಪ್ತಿಯ ಮಾದಾಪುರದಲ್ಲಿ ನಡೆದಿದೆ. ದಿನಾಂಕ 11/10/2010ರಂದು ರಾತ್ರಿ ಮಾದಾಪುರದ ಸಿದ್ದಿ ಬುದ್ದಿ ವಿನಾಯಕ ದೇವಸ್ಥಾನದ ಅರ್ಚಕ ಕೃಷ್ಣಭಟ್‌ರವರು ಎಂದಿನಂತೆ ದೇವಾಲಯದ ಪೂಜೆ ಮುಗಿಸಿ ಬಾಗಿಲು ಹಾಕಿಕೊಂಡು ಮನೆಗೆ ಹೋಗಿದ್ದು, ಈ ದಿನ ಬೆಳಿಗ್ಗೆ ಪೂಜೆಗೆಂದು ಬಂದು ನೋಡಿದಾಗ ದೇವಾಲಯದಲ್ಲಿದ್ದ ಕಾಣಿಕೆ ಹುಂಡಿಯನ್ನು ಯಾರೋ ಅಪರಿಚಿತ ಕಳ್ಳರು ಒಡೆದು ಅದರಲ್ಲಿದ್ದ ರೂ 2,000/-ಗಳನ್ನು ಕಳವು ಮಾಡಿದ್ದು, ಸೋಮವಾರಪೇಟೆ ಪೊಲೀಸರು ಪ್ರಕರಣ ದಾಖಲಿಸಿ ತನಿಖೆ ಕೈಗೊಂಡಿದ್ದಾರೆ.

ಕ್ಷುಲ್ಲಕ ಕಾರಣಕ್ಕೆ ಹಲ್ಲೆ, ವ್ಯಕ್ತಿಗೆ ಗಾಯ

  • ಕ್ಷುಲ್ಲಕ ಕಾರಣಕ್ಕೆ ವ್ಯಕ್ತಿಯೋರ್ವರ ಮೇಲೆ ಹಲ್ಲೆ ಮಾಡಿದ ಘಟನೆ ಸೋಮವಾರಪೇಟೆ ಠಾಣಾ ವ್ಯಾಪ್ತಿಯ ಶಾಂತಳ್ಳಿ ಗ್ರಾಮದ ಬಸವನಕಟ್ಟೆಯಿಂದ ವರದಿಯಾಗಿದೆ. ದಿನಾಂಕ 11/10/2010ರಂದು ಸಂಜೆ ಪ್ರಕರಣದ ಆರೋಪಿ ಚಂದ್ರ ಫಿರ್ಯಾದಿ ಎಸ್‌.ಕೆ.ಅಣ್ಣಪ್ಪನವರ ಪತ್ನಿ ಸೋಮಕ್ಕನವರೊಂದಿಗೆ ಜಗಳವಾಡುತ್ತಿದ್ದುದನ್ನು ಕಂಡ ಅಣ್ಣಪ್ಪನವರು ಜಗಳದ ಕಾರಣವನ್ನು ಕೇಳಿದಾಗ ಚಂದ್ರ ಅಣ್ಣಪ್ಪನವರನ್ನು ಅಶ್ಲೀಲ ಶಬ್ದಗಳಿಂದ ನಿಂದಿಸಿ ಅವರ ಕುತ್ತಿಗೆಗೆ ಕತ್ತಿಯಿಂದ ಕಡಿದು ಗಾಯಗೊಳಿರುವ ಬಗ್ಗೆ ಸೋಮವಾರಪೇಟೆ ಪೊಲೀಸರು ಮೊಕದ್ದಮೆ ದಾಖಲಿಸಿ ತನಿಖೆ ಮುಂದುವರೆಸಿದ್ದಾರೆ.

ವರದಕ್ಷಿಣೆ ಕಿರುಕುಳ, ಪ್ರಕರಣ ದಾಖಲು

  • ವರದಕ್ಷಿಣೆ ತರುವಂತೆ ಪೀಡಿಸಿ ಪತ್ನಿಯ ಮೇಲೆ ಹಲ್ಲೆ ಮಾಡಿರುವ ಘಟನೆ ಶನಿವಾರಸಂತೆ ಠಾಣಾ ವ್ಯಾಪ್ತಿಯ ಹೆಗ್ಗುಳ ಗ್ರಾಮದಲ್ಲಿ ವರದಿಯಾಗಿದೆ. ಹೆಗ್ಗುಳ ಗ್ರಾಮದ ಹೆಚ್‌.ಎ.ವಾಣಿ ಎಂಬವರು ಸುಮಾರು 3 ವರ್ಷಗಳ ಹಿಂದೆ ಅದೇ ಗ್ರಾಮದ ಗಿರೀಶ ಎಂಬವರನ್ನು ಮದುವೆಯಾಗಿದ್ದು, ಗಡಿ ಭದ್ರತಾ ಪಡೆಯಲ್ಲಿ ಉದ್ಯೋಗದಲ್ಲಿರುವ ಆಕೆಯ ಗಂಡ ಗಿರೀಶನು ವರ್ಷಕ್ಕೆರಡು ಬಾರಿ ಮನೆಗೆ ಬಂದು ಹೋಗುತ್ತಿದ್ದನು, ಹಾಗೆ ಮನೆಗೆ ಬಂದಾಗಲೆಲ್ಲಾ ತನ್ನ ಪತ್ನಿ ವಾಣಿಯನ್ನು ತನ್ನ ತವರು ಮನೆಯಿಂದ ಹಣ ತರುವಂತೆ ಪೀಡಿಸುತ್ತಿದ್ದು, ದಿನಾಂಕ 10/10/2010ರಂದು ವಾಣಿ ತನ್ನ ತವರು ಮನೆಯಲ್ಲಿರುವಾಗ್ಗೆ ಆರೋಪಿಗಳಾದ ಗಿರೀಶ, ಮತ್ತು ಪೊನ್ನಮ್ಮರವರುಗಳು ಬಂದು ವಾಣಿಯೊಂದಿಗೆ ಜಗಳ ಮಾಡಿ ವರದಕ್ಷಿಣೆ ಹಣ ಕೊಡದಿದ್ದರೆ ಕೊಲೆ ಮಾಡುವುದಾಗಿ ಬೆದರಿಸಿ ಆಕೆ ಮೇಲೆ ಹಲ್ಲೆ ಮಾಡಿರುವುದಾಗಿ ವರದಿಯಾಗಿದ್ದು, ಶನಿವಾರಸಂತೆ ಪೊಲೀಸರು ಪ್ರಕರಣ ದಾಖಲಿಸಿ ತನಿಖೆ ಕೈಗೊಂಡಿರುತ್ತಾರೆ.