Wednesday, October 28, 2015

ಅಕ್ರಮ ಗೋಸಾಗಾಟ ಪತ್ತೆ
              ಅಕ್ರಮವಾಗಿ ಗೋಸಾಗಾಟ ಮಾಡುತ್ತಿದ್ದುದನ್ನು ಗೋಣಿಕೊಪ್ಪ ಪೊಲೀಸರು ಪತ್ತೆ ಹಚ್ಚಿದ್ದಾರೆ. ದಿನಾಂಕ 27/10/2015ರಂದು ಮಾಯಮುಡಿ ಗ್ರಾಮದ ಮಡಿಕೆಬೀಡುವಿನಿಂದ ಯಾರೋ 4 ಜನ ವ್ಯಕ್ತಿಗಳು ಪಿಕ್ ಆಪ್ ವಾಹನದಲ್ಲಿ ಗೋವುಗಳನ್ನು ಅಕ್ರಮವಾಗಿ ಕಸಾಯಿಖಾನೆಗೆ ಸಾಗಿಸುತ್ತಿರುವುದಾಗಿ ಬಂದ ದೊರೆತ ಮಾಹಿತಿಯ ಮೇರೆಗೆ ಗೋಣಿಕೊಪ್ಪ ಪಿಎಸ್‌ಐ ಜೆ.ಇ.ಮಹೇಶ್‌ರವರು ಸಿಬ್ಬಂದಿಯೊಂದಿಗೆ ಹಂಚಿನ ಕಾರ್ಖಾನೆ ಬಳಿ ತಲುಪವಾಗ ಎದುರಿನಿಂದ ಕೆಎ-12-ಎ-420 ಸಂಖ್ಯೆಯ ಒಂದು ಒಂದು ಪಿಕ್ ಅಫ್ ವಾಹನ ಬರುತ್ತಿದ್ದುದನ್ನು ತಡೆದು ನಿಲ್ಲಿಸಿದಾಗ ಪಿಕ್ ಆಪ್ ವಾಹನದಲ್ಲಿ ಇದ್ದ ಚಾಲಕ ಮತ್ತು ಇತರರು ವಾಹನದಿಂದ ಹಾರಿ ಇಳಿದು ಪಕ್ಕದ ತೋಟದೊಳಗೆ ಓಡಿ ಹೋಗಿ ತಪ್ಪಿಸಿಕೊಂಡಿದ್ದು, ನಂತರ ಪಿಎಸ್‌ಐರವರು ಪಿಕ್ ಆಪ್ ವಾಹನವನ್ನು ಪರಿಶೀಲಿಸಿದಾಗ ಅದರಲ್ಲಿ ಅಕ್ರಮವಾಗಿ ಸಾಗಾಟ ಮಾಡುತ್ತಿದ್ದ ಗೋವುಗಳು ಕಂಡು ಬಂದಿದ್ದು ವಾಹನ ಮತ್ತು ಗೋವುಗಳನ್ನು ಅಮಾನತ್ತು ಪಡಿಸಿಕೊಂಡು ಮೊಕದ್ದಮೆ ದಾಖಲಿಸಿ ತನಿಖೆ ಕೈಗೊಂಡಿದ್ದಾರೆ.

ಪತ್ನಿಯ ಮೇಲೆ ಹಲ್ಲೆ, ಕಿರುಕುಳ
                 ಪಾನಮತ್ತನಾಗಿ ಮತ್ನಿಯ ಮೇಲೆ ಹಲ್ಲೆ ಮಾಡಿದ ಘಟನೆ ವಿರಾಜಪೇಟೆ ನಗರದಲ್ಲಿ ನಡೆದಿದೆ. ವಿರಾಜಪೇಟೆ ನಗರದ 5ನೇ ವಿಭಾಗದ ನಿವಾಸಿ ಸಕೀನಾರವರು ಅಫ್ಜಲ್‌ ಎಂಬವರನ್ನು 1998ನೇ ಸಾಲಿನಲ್ಲಿ  ಮದುವೆಯಾಗಿ ಇಬ್ಬರು ಮಕ್ಕಳಿದ್ದು, ಪತಿ ಅಫ್ಜಲ್ ಪ್ರತಿ ದಿನ ಕುಡಿದುಕೊಂಡು ಬಂದು ಪತ್ನಿ ಸಕೀನಾರೊಂದಿಗೆ ಜಗಳ ಮಾಡಿ ಮಾನಸಿಕ ಹಾಗೂ ದೈಹಿಕ ಹಿಂಸೆ ನೀಡುತ್ತಿರುವುದಲ್ಲದೇ ದಿನಾಂಕ 27-10-2015 ರಂದು ಅಫ್ಜಲ್‌  ಮದ್ಯಪಾನ ಮಾಡಿಕೊಂಡು ಬಂದು ಸಕೀನಾರವರಿಗೆ ದೊಣ್ಣೆಯಿಂದ ಶರೀರಕ್ಕೆ ಹೊಡೆದು ನೋವು ಪಡಿಸಿರುವುದಲ್ಲದೇ ಕೊಲೆ ಬೆದರಿಕೆ ಹಾಖಿರುವುದಾಗಿ ನೀಡಿದ ದೂರಿನ ಮೇರೆಗೆ ವಿರಾಜಪೇಟೆ ನಗರ ಪೊಲೀಸರು ಪ್ರಕರಣ ದಾಖಲಿಸಿ ತನಿಖೆ ಕೈಗೊಂಡಿದ್ದಾರೆ.

ಅಕ್ರಮ ಮರಳು ಸಾಗಾಟ, ಮರಳು ವಶ
                     ಅಕ್ರಮವಾಗಿ ಮರಳು ಸಾಗಾಟ ಮಾಡುತ್ತಿದ್ದ ಪ್ರಕರಣವೊಂದನ್ನು ಪತ್ತೆ ಹಚ್ಚಿದ ಸೋಮವಾರಪೇಟೆ ಪೊಲೀಸರು ಪತ್ತೆ ಹಚ್ಚಿದ್ದಾರೆ. ದಿನಾಂಕ 27.10.2015 ರಂದು ಸೋಮವಾರಪೇಟೆ ಠಾಣೆ ಎಎಸ್‌ಐ ಮಂಚಯ್ಯನವರು ಸಿಬ್ಬಂದಿಯೊಂದಿಗೆ ಗಸ್ತಿನಲ್ಲಿರುವಾಗ ಮಾದಾಪುರ ಹೊಳೆಯಿಂದ ಒಂದು ಟಿಪ್ಪರ್ ಲಾರಿಯಲ್ಲಿ ಕಳ್ಳತನದಿಂದ ಮರಳನ್ನು ತುಂಬಿಕೊಂಡು ಬರುತ್ತಿರುವುದಾಗಿ ಸಿಕ್ಕಿದ ಖಚಿತ ಮಾಹಿತಿ ಮೇರೆಗೆ ಮಾದಾಪುರ ಸೇತುವೆ ಹತ್ತಿರ ಕಾಯುತ್ತಾ ನಿಂತಿರುವಾಗ ಮಡಿಕೇರಿ ಕಡೆಯಿಂದ ಕೆಎ-04-ಸಿ-5111 ರ ಒಂದು ಟಿಪ್ಪರ್ ಲಾರಿ ಬಂದಿದ್ದು ಅದನ್ನು ತಡೆದು ಪರಿಶೀಲಿಸಿದಾಗ ಲಾರಿಯ ಹಿಂಭಾಗದಲ್ಲಿ ಮರಳನ್ನು ತುಂಬಿರುವುದು ಕಂಡು ಬಂದಿದ್ದು, ಟಿಪ್ಪರ್ ಲಾರಿಯ ಚಾಲಕ ಐಗೂರು ಗ್ರಾಮದ ಹೇಮಂತ್‌ರವರನ್ನು ವಿಚಾರಿಸಿದಾಗ ಸರ್ಕಾರದ ಯಾವುದೇ ಪರವಾನಗಿ ಇಲ್ಲದೇ ಹೊಳೆಯಿಂದ ಮರಳನ್ನು ಕದ್ದು ತುಂಬಿಸಿಕೊಂಡು ಬರುತ್ತಿರುವುದಾಗಿ ತಿಳಿಸಿದ್ದು ಸಾಗಾಟವು ಅಕ್ರಮವಾಗಿರುವುದರಿಂದ ಎಎಸ್‌ಐ ಮಂಚಯ್ಯನವರು ಮರಳು ಸಮೇತ ಲಾರಿಯನ್ನು ಅಮಾನತುಪಡಿಸಿಕೊಂಡು ಚಾಲಕನನ್ನು ಬಂಧಿಸಿ ಮೊಕದ್ದಮೆ ದಾಖಲಿಸಿ ತನಿಖೆ ಕೈಗೊಂಡಿದ್ದಾರೆ.