Wednesday, November 25, 2015

ಮನುಷ್ಯ ಕಾಣೆ, ಪ್ರಕರಣ ದಾಖಲು:

     ಮನೆಯಿಂದ ಸೋಮವಾರಪೇಟೆ ನಗರಕ್ಕೆ ಹೋಗಿಬರುವುದಾಗಿ ತಿಳಿಸಿ ಹೋದ ವ್ಯಕ್ತಿಯೊಬ್ಬರು ಕಾಣೆಯಾಗಿರುವ ಬಗ್ಗೆ ವರದಿಯಾಗಿದೆ. ಸೋಮವಾರಪೇಟೆ ತಾಲೂಕು ನಿಲುವಾಗಿಲು ಗ್ರಾಮದ ನಿವಾಸಿ 50 ವರ್ಷಪ್ರಾಯದ ಹೆಚ್.ಟಿ. ಅಪ್ಪಣ್ಣಗೌಡ ಎಂಬವರು ದಿನಾಂಕ 23-11-2015 ರಂದು ಬೆಳಗ್ಗೆ 8-00 ಗಂಟೆಗೆ ಸ್ವಂತ ಕೆಲಸ ಮೇಲೆ ಸೋಮವಾರಪೇಟೆಗೆ ಹೋಗಿಬರುವುದಾಗಿ ತಿಳಿಸಿ ಹೋದವರು ಮತ್ತೆ ಮನೆಗೆ ಬಾರದೆ ಕಾಣೆಯಾಗಿದ್ದು, ಈ ಸಂಬಂಧ ಸದರಿ ಹೆಚ್.ಟಿ. ಅಪ್ಪಣ್ಣಗೌಡರವರ ಅಳಿಯ ಪಿ.ಡಿ. ರಮೇಶ್ ಎಂಬವರು ನೀಡಿದ ದೂರಿನ ಮೇರೆಗೆ ಸೋಮವಾರಪೇಟೆ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ. 

ವಿನಾಕಾರಣ ವ್ಯಕ್ತಿ ಮೇಲೆ ಹಲ್ಲೆ, ಗಾಯ:

  ತಮ್ಮ ಮನೆಗೆ ವಾಪಾಸಾಗುತ್ತಿದ್ದ ವ್ಯಕ್ತಿಯ ಮೇಲೆ ವಿನಾಕಾರಣ ವ್ಯಕ್ತಿಯೋರ್ವ ಟಾರ್ಚ್ ಲೈಟ್ ನಿಂದ ಹಲ್ಲೆ ನಡೆಸಿ ಗಾಯಪಡಿಸಿದ ಘಟನೆ ಪೊನ್ನಂಪೇಟೆ ಠಾಣಾ ಸರಹದ್ದಿನ ಬೆಸಗೂರು ಗ್ರಾಮದಲ್ಲಿ ನಡೆದಿದೆ. ದಿನಾಂಕ 24-11-2015 ರಂದು ಸಮಯ 7-30 ಪಿ.ಎಂ ಗೆ ಬೆಸಗೂರು ಗ್ರಾಮದ ನಿವಾಸಿ ಪಿರ್ಯಾದಿ ಅರಮಣಮಾಡ ಹರೀಶ್ ಎಂಬವರು ಬೆಸಗೂರು ದೇವಸ್ಥಾನದಲ್ಲಿ ಶೆಟಲ್ ಆಡಿ ವಾಪಾಸು ಮನೆಯ ಕಡೆ ಹೋಗುತ್ತಿದ್ದಾಗ ಆರೋಪಿ ಬಿಲ್ಲವರ ನಾಗೇಶ್ ಎಂಬ ವ್ಯಕ್ತಿ ಇದ್ದಕ್ಕಿದ್ದಂತೆ ಕೈಯಲ್ಲಿದ್ದ ಟಾರ್ಚ್ ನಿಂದ ಪಿರ್ಯಾದಿಯವರ ಬಲ ಭಾಗದ ಹಣೆಗೆ ಗುದ್ದಿ ಗಾಯ ಮತ್ತು ನೋವು ಪಡಿಸಿರುತ್ತಾರೆಂದು ಫಿರ್ಯಾದಿ ಅರಮಣಮಾಡ ಹರೀಶ್ ರವರು ನೀಡಿದ ದೂರಿನ ಮೇರೆಗೆ ಪೊನ್ನಂಪೇಟೆ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

ಹಳೆಯ ದ್ವೇಷದಿಂದ ಚಾಕುವಿನಿಂದ ಹಲ್ಲೆ:

   ವ್ಯಕ್ತಿಯೊಬ್ಬರು ತಮ್ಮ ಮನೆಗೆ ನಡೆದುಕೊಂಡು ಹೋಗುತ್ತಿದ್ದಾಗ ಅವರನ್ನು ತಡೆದು ಹಲ್ಲೆನಡೆಸಿದ ಘಟನೆ ವರದಿಯಾಗಿದೆ. ದಿನಾಂಕ 24-11-2015 ರಂದು ಸಮಯ 8-30 ಪಿ.ಎಂ ಗೆ ವಿರಾಜಪೇಟೆ ತಾಲೋಕು ಬೆಸಗೂರು ಗ್ರಾಮದ ನಿವಾಸಿ ಕೂಲಿ ಕಾರ್ಮಿಕ ಬಿ.ಪಿ.ನಾಗೇಶ ಎಂಬವರು ತಮ್ಮ ತಂದೆಯೊಂದಿಗೆ ಅತ್ತೆಯ ಮನೆಗೆ ನಡೆದುಕೊಂಡು ಹೋಗುತ್ತಿರುವಾಗ್ಗೆ ಅರಮಣಮಾಡ ಹರೀಶ್ ಎಂಬವರು ಹಳೆಯ ದ್ವೇಷದಿಂದ ನಾಗೇಶ್ ರವರ ದಾರಿ ತಡೆದು ಚಾಕುವಿನಿಂದ ಬಲ ಕಿವಿಯ ಭಾಗಕ್ಕೆ ಚುಚ್ಚಿ ಹಾಗೂ ಕೈಯಿಂದ ಮುಖದ ಭಾಗಕ್ಕೆ ಗುದ್ದಿ ನೋವುಪಡಿಸಿರುತ್ತಾರೆಂದು ನೀಡಿದ ದೂರಿನ ಮೇರೆಗೆ ಪೊನ್ನಂಪೇಟೆ ಠಾಣೆಯಲ್ಲಿ ಪ್ರಕರಣ ದಾಖಲಿಸಿದ ಪೊಲೀಸರು ಮುಂದಿನ ಕ್ರಮ ಕೈಗೊಂಡಿದ್ದಾರೆ.

ಸಹಕಾರ ಸಂಘದ ಕಟ್ಟಡದಿಂದ ಪಡಿತರ ಕಳವು:

    ಸಹಕಾರ ಸಂಘದ ಕಟ್ಟಡಕ್ಕೆ ಕಳ್ಳರು ನುಗ್ಗಿ ಪಡಿತರ ಕಳ್ಳತನ ಮಾಡಿದ ಘಟನೆ ಕುಶಾಲನಗರದ ರಂಗಸಮುದ್ರ ಸಹಕಾರ ಸಂಘದಲ್ಲಿ ನಡೆದಿದೆ. ದಿನಾಂಕ 23-11-2015 ರ 2-00 ಗಂಟೆಯಿಂದ 24-11-2015ರ 6-00 ಗಂಟೆಯ ಅವಧಿಯಲ್ಲಿ ರಂಗಸಮುದ್ರ ಸಹಕಾರ ಸಂಘದ ಕಟ್ಟಡದ ಹೆಂಚುಗಳನ್ನು ತೆಗೆದು ಒಳಗೆ ಪ್ರವೇಶಿಸಿ 3ನೇ ಕೋಣೆಯಲ್ಲಿ ದಾಸ್ತಾನು ಮಾಡಿ ಇಟ್ಟಿದ್ದ ಉಚಿತ ಪಡಿತರ 12 ಚೀಲ ಅಕ್ಕಿ, 2ನೇ ಕೋಣೆಯಲ್ಲಿ ಇಟ್ಟಿದ್ದ ಉಚಿತ ಪಡಿತರ 5 ಚೀಲ ಗೋದಿ, 5 ಲೀಟರ್ ತಾಳೆ ಎಣ್ಣೆ, 15 ಕೆಜಿ ಸಕ್ಕರೆ, 15 ಕೆ.ಜಿ ಉಪ್ಪು ಕಳ್ಳತನಮಾಡಿ ಕೊಂಡು ಹೋಗಿರುತ್ತಾರೆಂದು ಕಾರ್ಯದರ್ಶಿ ಲ್ಯಾಂಪ್ಸ್ ಸಹಕಾರ ಸಂಘ ಬಸವನಹಳ್ಳಿ ಕುಶಾಲನಗರ ಇವರು ನೀಡಿದ ದೂರಿನನ್ವಯ ಕುಶಾಲನಗರ ಠಾಣೆಯಲ್ಲಿ ಪ್ರಕರಣ ದಾಖಲಿಸಿದ ಪೊಲೀಸರು ತನಿಖೆ ಕೈಗೊಂಡಿದ್ದಾರೆ.

ಹೆಂಗಸು ಕಾಣೆ:

   ವಿರಾಜಪೇಟೆ ನಗರಕ್ಕೆ ಹೋದ ಮಹಿಳೆಯೊಬ್ಬರು ಕಾಣೆಯಾದ ಘಟನೆ ನಡೆದಿದೆ. ವಿರಾಜಪೇಟೆ ತಾಲೂಕು ಕುಕ್ಲೂರು ಗ್ರಾಮದ ನಿವಾಸಿ ಎ.ಟಿ. ಜಾನ್ಸನ್ ಎಂಬವರು ಒಂದು ವರ್ಷದ ಹಿಂದೆ ಚಿಕ್ಕಮಂಗಳೂರು ಜಿಲ್ಲೆಯ ಅಂತೋಣಿರವರ ಮಗಳು ಜ್ಯೋತಿ ರವರನ್ನು ಮದುವೆಯಾಗಿದ್ದು, ದಿನಾಂಕ 21-11-2015 ರಂದು ಬೆಳಿಗ್ಗೆ 8-30 ಗಂಟೆಗೆ ಕುಕ್ಲೂರುವಿನ ತಮ್ಮ ಮನೆಯಿಂದ ವಿರಾಜಪೇಟೆ ನಗರದ ದೇವಸ್ಥಾನಕ್ಕೆ ಪೂಜೆಗೆಂದು ಬಂದು, ಪೂಜೆ ಮುಗಿಸಿಕೊಂಡು ನಗರದಲ್ಲಿ ಬಟ್ಟೆ ಖರೀದಿಸಿ ಸಮಯ 11-00 ಗಂಟೆಗೆ ಹೆಂಡತಿ ಜ್ಯೋತಿಯನ್ನು ಮನೆಗೆ ಹೋಗುವಂತೆ ತಿಳಿಸಿ ಮೊಬೈಲ್ ರಿಪೇರಿ ಮಾಡಿಸಿಕೊಂಡು ವಾಪಾಸ್ಸು ಮನೆಗೆ 12-00 ಗಂಟೆಗೆ ಹೋದಾಗ, ಹೆಂಡತಿ ಜ್ಯೋತಿ ಕಾಣೆಯಾಗಿರುವುದು ಕಂಡು ಬಂದಿದ್ದು, ಈ ಸಂಬಂಧ ಫಿರ್ಯಾದಿ ಎ.ಟಿ. ಜಾನ್ಸನ್ರವರು ನೀಡಿದ ದೂರಿನ ಮೇರೆಗೆ ವಿರಾಜಪೇಟೆ ನಗರ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

ಸರ್ಕಾರಿ ಕೆಲಸ ಕೊಡಿಸುವುದಾಗಿ ವ್ಯಕ್ತಿಗೆ ವಂಚನೆ:

    ಪೊನ್ನಂಪೇಟೆ ನಗರದ ನಿವಾಸಿ ಶ್ರೀಮತಿ ಸುಮತಿ ನಾಯಕ್ ಎಂಬ ಮಹಿಳೆಗೆ ತಾನು ವಿಜಿಲೆನ್ಸ್ ಡಿಪಾರ್ಟ್ ಮೆಂಟ್ ನಲ್ಲಿ ಡೆಪ್ಯುಟಿ ಡೈರೆಕ್ಟರ್ ಆಗಿರುವುದಾಗಿ ಪರಿಚಯ ಮಾಡಿಕೊಂಡ ವ್ಯಕ್ತಿ ಜಯತೀರ್ಥ ಜಿ. ಕುಲಕರ್ಣಿ, ತಿಲಕ್ ಚೌಕ್ ಬೆಳಗಾಂ ಇವರು ದಿನಾಂಕ 29-12-2014ರ ನಂತರದ ದಿನಗಳಲ್ಲಿ ಸರ್ಕಾರಿ ಕೆಲಸ ಕೊಡಿಸುವುದಾಗಿ ನಂಬಿಸಿ ಸುಮಾರು 6,00000/- ಗಳನ್ನು ಪಡೆದುಕೊಂಡು ಯಾವುದೇ ಕೆಲಸವನ್ನು ಕೊಡಿಸದೇ ಹಾಲಿ ಯಾವುದೇ ಸಂಪರ್ಕಕ್ಕೆ ಸಿಗದೇ ವಂಚಿಸಿರುತ್ತಾತೆಂದು ಫಿರ್ಯಾದಿ ಶ್ರೀಮತಿ ಸುಮತಿನಾಯಕ್ ರವರು ನೀಡಿದ ದೂರಿನ ಮೇರೆಗೆ ಪೊನ್ನಂಪೇಟೆ ಠಾಣೆಯಲ್ಲಿ ಪ್ರಕರಣ ದಾಖಲಿಸಿಕೊಂಡ ಪೊಲೀಸರು ತನಿಖೆ ಕೈಗೊಂಡಿದ್ದಾರೆ.