Tuesday, November 3, 2015

ಮರ ಬಿದ್ದು ವ್ಯಕ್ತಿಯ ಸಾವು
                  ಕೆಲಸ ಮಾಡುತ್ತಿದ್ದಾಗ ಮರ ಬಿದ್ದು ವ್ಯಕ್ತಿಯೊಬ್ಬ ಸಾವಿಗೀಡಾದ ಘಟನೆ ಪಾಲಿಬೆಟ್ಟದಲ್ಲಿ ನಡೆದಿದೆ. ದಿನಾಂಕ 03-11-2015 ರಂದು ನೆಲ್ಲಿ ಹುದಿಕೇರಿ ನಿವಾಸಿ ಸಿ.ಸಿ. ಜೋಸ್‌ ಎಂಬವರ ಅಣ್ಣ  ಬೇಬಿ ಚಾಕೋ ಎಂಬುವವರು ಬೆಳಿಗ್ಗೆ ಟಿಂಬರ್ ಕೆಲಸಕ್ಕೆಂದು ಪಾಲಿಬೆಟ್ಟ ಬಳಿಯ ಎಮ್ಮೆಗುಂಡಿ ಎಸ್ಟೇಟ್ ಗೆ ಇತರೆ ಕೆಲಸದವರೊಂದಿಗೆ ಹೋಗಿದ್ದು, ಬೇಬಿ ಚಾಕೋರವರು ಟಿಂಬರ್ ಕೆಲಸ ಮಾಡುವಾಗ ಅವರ ಮೇಲೆ ಆಕಸ್ಮಿಕವಾಗಿ ಮರವು ತುಂಡಾಗಿ ಉರುಳಿ ಬಿದ್ದಿದ್ದು, ಅವರನ್ನು ಅಮತ್ತಿ ಆರ್.ಹೆಚ್.ಪಿ. ಆಸ್ಪತ್ರೆಗೆ ಕರೆದುಕೊಂಡು ಹೋಗಿದ್ದು ಅಸ್ಪತ್ರೆಯಲ್ಲಿ ಮೃತಪಟ್ಟಿರುವುದಾಗಿ ಮೃತ ಬೇಬಿ ಚಾಕೋರವರ ತಮ್ಮ ಸಿ.ಸಿ.ಜೋಸ್‌ರವರು ನೀಡಿದ ದೂರಿನ ಮೇರೆಗೆ ಸಿದ್ದಾಪುರ ಪೊಲೀಸರು ಪ್ರಕರಣ ದಾಖಲಿಸಿ ತನಿಖೆ ಕೈಗೊಂಡಿದ್ದಾರೆ.

ಮಹಿಳೆ ಮೇಲೆ ಹಲ್ಲೆ, ಕೊಲೆ ಬೆದರಿಕೆ
               ಒಂಟಿ ಮಹಿಳೆಯೊಬ್ಬರ ಮೇಲೆ ಹಲ್ಲೆ ನಡೆಸಿ ಕೊಲೆ ಬೆದರಿಕೆ ಹಾಕಿರುವ ಘಟನೆ ಸಿದ್ದಾಪುರ ಬಳಿಯ ಕೊಂಡಂಗೇರಿಯಲ್ಲಿ ನಡೆದಿದೆ. ದಿನಾಂಕ 02-11-2015 ರಂದು ನಡು ರಾತ್ರಿ ಕೊಂಡಂಗೇರಿ ಗ್ರಾಮದ ನಿವಾಸಿ ತಾಜುನ್ನೀಸಾ ಎಂಬವರು ಮನೆಯಲ್ಲಿ ಮಲಗಿದ್ದ ವೇಳೆ ಬಾಗಿಲು ತಟ್ಟಿದ ಶಬ್ಧ ಕೇಳಿ ಬಂದು ಬಾಗಿಲು ತೆರೆದು ನೋಡಿದಾಗ, ಅವರ ಗಂಡನ ಅಣ್ಣ ಅಬ್ಬಾಸ್‌ರವರು ಬಾಗಿಲ ಹೊರಗೆ ನಿಂತಿದ್ದುದನ್ನು ನೋಡಿ ಏಕೆ ಬಾಗಿಲು ತಟ್ಟಿದ್ದೆಂದು ಕೇಳಿದಾಗ, ಆತನು ತಾಜುನ್ನೀಸಾರವರನ್ನು ಅನೈತಿಕ ಕ್ರಿಯೆಗೆ ಒತ್ತಾಯಿಸಿದ್ದುಆಗ ಆಕೆ  ಕಿರುಚಿಕೊಂಡಾಗ ಅಬ್ಬಾಸ್ ರವರು ತನ್ನ ಕೈಯಲ್ಲಿದ್ದ ಕತ್ತಿಯ ಹಿಂಭಾಗದಿಂದ ಆಕೆಯ ಮೇಲೆ ಹಲ್ಲೆ ನಡೆಸಿ ಕೊಲೆ ಬೆದರಿಕೆ ಹಾಕಿರುವುದಾಗಿ  ನೀಡಿದ ದೂರಿನ ಮೇರೆಗೆ ಸಿದ್ದಾಪುರ  ಪೊಲೀಸರು ಪ್ರಕರಣ  ದಾಖಲಿಸಿ ತನಿಖೆ  ಕೈಗೊಂಡಿದ್ದಾರೆ.