Monday, November 9, 2015

ದ್ವೇಷದ ಹಿನ್ನೆಲೆ, ಮನೆಗೆ ನುಗ್ಗಿ ವ್ಯಕ್ತಿ ಮೇಲೆ ಹಲ್ಲೆ:

     ಹಳೆಯ ದ್ವೇಷದಿಂದ ವ್ಯಕ್ತಿಯೊಬ್ಬರ ಸಂಬಂಧಿಕರು ಮನೆಗೆ ನುಗ್ಗಿ ಹಲ್ಲೆ ನಡೆಸಿದ ಘಟನೆ ಪಾಲಿಬೆಟ್ಟದಲ್ಲಿ ನಡೆದಿದೆ. ವಿರಾಜಪೇಟೆ ತಾಲೂಕಿನ ಪಾಲಿಬೆಟ್ಟದ ಊರುಗುಪ್ಪೆ ಎಂಬಲ್ಲಿ ವಾಸವಾಗಿರುವ ಎಂ.ಎ. ಹಮೀದ್ ಎಂಬವರು ದಿನಾಂಕ 8/11/15 ರಂದು ತಮ್ಮ ಮನೆಯಲ್ಲಿರುವಾಗ್ಗೆ ಅವರ ಅಣ್ಣನ ಮಗ ನೌಫಲ್ ಮತ್ತು ಅಣ್ಣನ ಮಗಳ ಗಂಡ ರಫೀಕ್ ರವರು ಹಮೀದ್ ರವರ ಮನೆಗೆ ಅಕ್ರಮ ಪ್ರವೇಶ ಮಾಡಿ ಹಳೆ ದ್ವೇಶದಿಂದ ಜಗಳ ತೆಗೆದು ದೊಣ್ಣೆಯಿಂದ ಹಲ್ಲೆ ಮಾಡಿ ಗಾಯಪಡಿಸಿದ್ದು ಈ ಸಂಬಂಧ ಎಂ.ಎ. ಹಮೀದ್ ರವರು ನೀಡಿದ ದೂರಿನ ಮೇರೆಗೆ ಸಿದ್ದಾಪುರ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ. 

ಮನೆಗೆ ಆಹ್ವಾನಿಸಿ ವ್ಯಕ್ತಿಯ ಮೇಲೆ ಹಲ್ಲೆ: 

     ಯಾವುದೋ ವಿಚಾರವನ್ನು ಮಾತನಾಡಲು ಮನೆಗೆ ಆಹ್ವಾನಿಸಿ ಅವಾಚ್ಯ ಶಬ್ದಗಳಿಂದ ಬೈದು ಹಲ್ಲೆ ನಡೆಸಿದ ಘಟನೆ ಪಾಲಿಬೆಟ್ಟ ಗ್ರಾಮದಲ್ಲಿ ನಡೆದಿದೆ. ದಿನಾಂಕ 08-11-2015 ರಂದು ಸಂಜೆ ಸಮಯ 03:30 ಗಂಟೆಗೆ ಪಾಲಿಬೆಟ್ಟ ವಾಸಿ ನೌಫಲ್ ರವರು ಆತನ ಮನೆಗೆ ಹೋಗುತ್ತಿರುವಾಗ ಪಕ್ಕದ ವಾಸಿ ಹಮೀದ್ ರವರು ಹಳೆಯ ವಿಚಾರದಲ್ಲಿ ಮಾತನಾಡುವ ಸಲುವಾಗಿ ಮನೆಗೆ ಅವಾಚ್ಯ ಶಬ್ದಗಳಿಂದ ಬೈದು ರೀಪ್ ಪಟ್ಟಿಯಿಂದ ಹಲ್ಲೆ ನಡೆಸಿ ಗಾಯಪಡಿಸಿದ್ದು ಅಲ್ಲದೆ ಕೊಲೆ ಮಾಡುವುದಾಗಿ ಬೆದರಿಕೆ ಹಾಕಿರುವುದಾಗಿ ನೀಡಿದ ದೂರಿನ ಮೇರೆಗೆ ಸಿದ್ದಾಪುರ ಠಾಣೆಯಲ್ಲಿ ಪ್ರಕರಣದ ದಾಖಲಿಸಿದ ಪೊಲೀಸರು ಮುಂದಿನ ಕ್ರಮ ಕೈಗೊಂಡಿದ್ದಾರೆ.

ಕ್ಲುಲಕ ವಿಚಾರ, ವ್ಯಕ್ತಿ ಮೇಲೆ ಹಲ್ಲೆ:

     ನೀರಿನ ಪೈಪಿನ ವಿಚಾರದಲ್ಲಿ ವ್ಯಕ್ತಿಯ ದಾರಿ ತಡೆದು ಹಲ್ಲೆ ನಡೆಸಿದ ಘಟನೆ 2ನೇ ಮೊಣ್ಣಂಗೇರಿ ಗ್ರಾಮದಲ್ಲಿ ನಡೆದಿದೆ. ಮಡಿಕೇರಿ ತಾಲೂಕು 2ನೇ ಮೊಣ್ಣಂಗೇರಿ ಗ್ರಾಮ ಪಂಚಾಯ್ತಿಯ ರಸ್ತೆಯ ಬದಿಯಲ್ಲಿ ಪೈಪೊಂದನ್ನು ಹಾಕಿ ವಿಚಾರದಲ್ಲಿ 2ನೇ ಮೊಣ್ಣಂಗೇರಿ ಗ್ರಾಮದ ನಿವಾಸಿ ಗಿಣಿ ಎಂಬವರು ಅದೇ ಗ್ರಾಮದ ಅಂಗರ ಅಂಜಿಲ ಎಂಬವರೊಂದಿಗೆ ಜಗಳ ಮಾಡಿ, ಬೈದು ದೊಣ್ಣೆಯಿಂದ ಹಲ್ಲೆ ನಡೆಸಿರುತ್ತಾರೆಂದು ನೀಡಿದ ದೂರಿನ ಮೇರೆಗೆ ಮಡಿಕೇರಿ ಗ್ರಾಮಾಂತರ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ. 

ದಾರಿ ತಡೆದು ಕೊಲೆ ಬೆದರಿಕೆ:

      ದಾಖಲಿಸಿದ ದೂರನ್ನು ವಾಪಾಸು ಪಡೆಯುವ ಬಗ್ಗೆ ವ್ಯಕ್ತಿಗೆ ಒತ್ತಾಯ, ಕೊಲೆ ಬೆದರಿಕೆ ಹಾಕಿದ ಘಟನೆ ಕುಶಾಲನಗರ ಠಾಣಾ ವ್ಯಾಪ್ತಿಯ ಕೂಡಿಗೆ ಗ್ರಾಮದಲ್ಲಿ ನಡೆದಿದೆ. ದಿನಾಂಕ 7-11-2015 ರಂದು ಸಮಯ 7-00 ಪಿ.ಎಂಗೆ ಹೆಗ್ಗಡಹಳ್ಳಿ ಗ್ರಾಮದ ಕೆ.ಬಿ. ಹರಿಪ್ರಸಾದ್ ಎಂಬವರು ಅವರ ಬಾಪ್ತು ಬೈಕ್ ನಂ ಕೆಎ 12 ಜೆ 4033 ರಲ್ಲಿ ಕುಶಾಲನಗರದಿಂದ ಮನೆಗೆ ಹೋಗುತ್ತಿರುವಾಗ ಕೂಡಿಗೆಯಲ್ಲಿ ಹೆಗ್ಗಡಳ್ಳಿ ನಿವಾಸಿ ಚಿಮ್ಮಿ ಎಂಬ ವ್ಯಕ್ತಿ ಸದಿರು ಕೆ.ಇ.ಹರಿಪ್ರಸಾದ್ ರವರನ್ನು ತಡೆದು ನಿಲ್ಲಿಸಿ ಅರಣ್ಯ ಇಲಾಖೆಯವರ ಮೇಲೆ ದಾಖಲಿಸಿರುವ ಕೇಸನ್ನು ವಾಪಾಸು ತೆಗೆಯದಿದ್ದರೆ ಕೊಂದು ಬಿಡುತ್ತೇವೆ, ಇಲ್ಲವೆ ಜಾತಿ ನಿಂದನೆ ಮತ್ತು ಹುಡುಗಿಯರನ್ನು ಚುಡಾಯಿಸಿದ್ದೀರಿ ಎಂದು ಕೇಸು ದಾಖಲಿಸುತ್ತೇವೆ ಎಂದುದಾರಿ ನೀಡಿದ ದೂರಿನ ಮೇರೆಗೆ ಕುಶಾಲನಗರ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

ದಾರಿ ವಿಚಾರದಲ್ಲಿ ವ್ಯಕ್ತಿಗೆ ಕೊಲೆ ಬೆದರಿಕೆ ಪ್ರಕರಣ ದಾಖಲು:

     ವ್ಯಕ್ತಿಯೊಬ್ಬರ ತೋಟಕ್ಕೆ ಹೋಗುವ ದಾರಿಯಲ್ಲಿ ನಡೆದುಕೊಂಡು ಹೋಗಲು ಅಡ್ಡಿಪಡಿಸಿ ಜೀವ ಬೆದರಿಕೆ ಹಾಕಿದ ಘಟನೆ ಹೊಸ್ಕೇರಿ ಗ್ರಾಮದಲ್ಲಿ ನಡೆದಿದೆ. ದಿನಾಂಕ 05-11-2015 ರಂದು ಸಂಜೆ 4-00 ಗಂಟೆಗೆ ಹೊಸ್ಕೇರಿ ಗ್ರಾಮದ ಶ್ರೀಮತಿ ಮಂಡೀರ ಕಮಲಮ್ಮನವರು ತಮ್ಮ ತೋಟಕ್ಕೆ ಹೋಗಿ ಬರುವಾಗ್ಗೆ ತಮ್ಮ ಕುಟುಂಬದವರೇ ಆದ ಮಂಡೀರ ಹರೀಶ್ ರವರು ದಾರಿ ತಡೆದು ನಿಲ್ಲಿಸಿ, ಅವಾಚ್ಯ ಶಬ್ದಗಳಿಂದ ಬೈದು ಇನ್ನೊಮ್ಮೆ ಈ ಕಡೆ ಬಂದರೆ ಕೈ-ಕಾಲುಗಳನ್ನು ಕತ್ತರಿಸಿ ಇಲ್ಲಿಯೇ ಹೂತು ಹಾಕಲಾಗುವುದೆಂದು ಕೈಯ್ಯಲ್ಲಿ ಕತ್ತಿ ಹಿಡಿದುಕೊಂಡು ಕೊಲೆ ಬೆದರಿಕೆ ಒಡ್ಡಿರುತ್ತಾರೆಂದು ನೀಡಿದ ದೂರಿನ ಮೇರೆಗೆ ಮಡಿಕೇರಿ ಗ್ರಾಮಾಂತರ ಠಾಣೆಯಲ್ಲಿ ಪ್ರಕರಣ ದಾಖಲಿಸಿದ ಪೊಲೀಸರು ತನಿಖೆ ಕೈಗೊಂಡಿರುತ್ತಾರೆ.