Monday, March 13, 2017

ಪತಿಯಿಂದ ಪತ್ನಿಯ ಕೊಲೆ
                     ಸಿದ್ದಾಪುರ ಸಮೀಪದ ವಾಲ್ನೂರು ಬಳಿಯ ಬಾಳೆಗುಂಡಿ ಗಿರಿಜನ ಹಾಡಿಯ ನಿವಾಸಿ ಪವಿತ್ರಾ ಎಂಬಾಕೆಯು ಆಕೆಯ ಪತಿ ವಸಂತ ಎಂಬಾತನೊಂದಿಗೆ ವಿರಸದಿಂದ ತವರು ಮನೆಯಲ್ಲಿದ್ದು ದಿನಾಂಕ 12/03/2017ರಂದು ಪತಿ ವಸಂತನು ಆಕೆಯನ್ನು ಕುರಿತು ಮನೆಗೆ ಕರೆದಿದ್ದು ಪವಿತ್ರಳು ವಸಂತನೊಂದಿಗೆ ಹೋಗಲು ನಿರಾಕರಿಸಿದಾಗ ವಸಂತನು ಪವಿತ್ರಳ ಮೇಲೆ ಕತ್ತಿಯಿಂದ ತೀವ್ರವಾಗಿ ಹಲ್ಲೆ ಮಾಡಿದ ಕಾರಣ ಪವಿತ್ರಳು ಸಾವಿಗೀಡಾಗಿದ್ದು ಪತ್ನಿಯನ್ನು ಕೊಲೆಗೈದ ವಸಂತನ ವಿರುದ್ದ ಸಿದ್ದಾಪುರ ಪೊಲೀಸರು ಪ್ರಕರಣ ದಾಖಲಿಸಿ ತನಿಖೆ ಕೈಗೊಂಡಿದ್ದಾರೆ.

ಅಕ್ರಮ ಮರಳು ಸಾಗಾಟ
                    ದಿನಾಂಕ 12/03/2017ರಂದು ಮಡಿಕೇರಿ ಗ್ರಾಮಾಂತರ ಠಾಣೆಯ ಪಿಎಸ್‌ಐ ಶಿವಪ್ರಕಾಶ್‌ರವರು ಗಸ್ತು ಕರ್ತವ್ಯದಲ್ಲಿರುವಾಗ ಸಂಪಾಜೆ ಬಳಿಯ ಪೆಟ್ರೋಲ್‌ ಬಂಕ್‌ ಒಂದರ ಬಳಿ ಬರುತ್ತಿದ್ದ ಕೆಎ-19-ಎಎ-4295 ರ ಐಷರ್‌ ಲಾರಿಯ ಚಾಲಕನು ಪೊಲೀಸ್‌ ವಾಹನವನ್ನು ಕಂಡು ಲಾರಿಯನ್ನು ನಿಲ್ಲಿಸಿ ಲಾರಿಯಿಂದ ಇಳಿದಯ ಓಡಿ ಹೋಗಿದ್ದು ಸಂಶಯಗೊಂಡ ಪಿಎಸ್‌ಐ ಶಿವಪ್ರಕಾಶ್‌ರವರು ಲಾರಿಯನ್ನು ಪರಿಶೀಲಿಸಿದಾಗ ಲಾರಿಯಲ್ಲಿ  ಸರ್ಕಾರದ ಪರವಾನಗಿ ಇಲ್ಲದೆ ಅಕ್ರಮವಾಗಿ ಮರಳನ್ನು ಸಾಗಾಟ ಮಾಡುತ್ತಿದ್ದುದು ಪತ್ತೆಯಾಗಿದ್ದು ಮರಳು ಸಮೇತ ಲಾರಿಯನ್ನು ವಶಪಡಿಸಿಕೊಂಡು ಮಡಿಕೇರಿ ಗ್ರಾಮಾಂತರ ಠಾಣೆಯಲ್ಲಿ ಪ್ರಕರಣ ದಾಖಲಿಸಿ ತನಿಖೆ ಕೈಗೊಂಡಿದ್ದಾರೆ.

ವ್ಯಕ್ತಿಯ ಆತ್ಮಹತ್ಯೆ
                     ದಿನಾಂಕ 11/03/2017ರಂದು ಶ್ರೀಮಂಗಲ ಬಳಿಯ ಟಿ.ಶೆಟ್ಟಿಗೇರಿ ಗ್ರಾಮದ ನಿವಾಸಿ ಪಣಿ ಎರವರ ಕಾವಲ ಎಂಬಾತನು ಮನೆಯಲ್ಲಿ ನೇಣು ಬಿಗಿದುಕೊಂಡು ಆತ್ಮಹತ್ಯೆ ಮಾಡಿಕೊಂಡಿದ್ದು ಅದೇ ದಿನ ಕಾವಲನು ಮದ್ಯಪಾನ ಮಾಡಿ ಬಂದು ಆತನ ಪತ್ನಿ ಮಂಜುಳಾರ ಮೊದಲ ಪತಿಯ ಮಗ ಅಜಿತ ಎಂಬಾತನಿಗೆ ಹೊಡೆದ ಕಾರಣಕ್ಕೆ ಪತ್ನಿ ಮಂಜುಳಾ ಮಗನೊಂದಿಗೆ ಪಕ್ಕದ ಮನೆಯ ಚಿಟ್ಟಿ ಎಂಬವರ ಮನೆಗೆ ಹೋಗಿದ್ದು ಈ ಸಂದರ್ಭದಲ್ಲಿ ಕಾವಲನು ಆತ್ಮಹತ್ಯೆ ಮಾಡಿಕೊಂಡಿರುವುದಾಗಿ ನೀಡಿದ ದೂರಿನ ಮೇರೆಗೆ ಶ್ರೀಮಂಗಲ ಪೊಲೀಸರು ಪ್ರಕರಣ ದಾಖಲಿಸಿ ತನಿಖೆ ಕೈಗೊಂಡಿದ್ದಾರೆ.

ಗುಮಾನಿ ವ್ಯಕ್ತಿಗಳ ಬಂಧನ
                 ದಿನಾಂಕ 12/03/2017ರ ಬೆಳಗಿನ ಜಾವ ಕುಶಾಲನಗರ ಗ್ರಾಮಾಂತರ ಠಾಣೆಯ ಸಿಬ್ಬಂದಿ  ಡಿ.ಆರ್‌.ರಂಗೇಗೌಡ ಮತ್ತು ಸಿಬ್ಬಂದಿಯವರು ಗಸ್ತು ಕರ್ತವ್ಯದಲ್ಲಿದ್ದಾಗ ಕೂಡು ಮಂಗಳೂರು ಗ್ರಾಮದ ದುರ್ಗಾಪರಮೇಶ್ವರಿ ದೇವಸ್ಥಾನದ ಬಳಿ ಕೂಡ್ಲೂರು ನಿವಾಸಿಗಳಾದ ರಾಜೇಶ ಮತ್ತು ಶಿವಪ್ರಸಾದ್‌ ಎಂಬವರುಗಳು ಕಬ್ಬಿಣದ ರಾಡನ್ನು ಹಿಡಿದುಕೊಂಡು ಯಾವುದೋ ಅಪರಾಧ ಕೃತ್ಯ ಎಸಗುವ ಉದ್ದೇಶದಿಂದ ಸಂಶಯಾಸ್ಪದವಾಗಿ ಸುತ್ತಾಡುತ್ತದ್ದವರನ್ನು  ಕಂಡು ವಿಚಾರಿಸಿದಾಗ ಅವರ ಇರುವಿಕೆಯ ಬಗ್ಗೆ ಸೂಕ್ತ ಸಮಜಾಯಿಸಿಕೆ ದೊರೆಯದ ಕಾರಣ ಅವರನ್ನು ಸಂಶಯದ ಮೇರೆಗೆ ಬಂಧಿಸಿ ಕುಶಾಲನಗರ ಗ್ರಾಮಾಂತರ ಠಾಣೆಯಲ್ಲಿ ಮೊಕದ್ದಮೆ ದಾಖಲಿಸಿ ತನಿಖೆ ಕೈಗೊಳ್ಳಲಾಗಿದೆ.

ಪಾದಚಾರಿಗೆ ಬೈಕ್‌  ಡಿಕ್ಕಿ
                ದಿನಾಂಕ 12/03/2017ರಂದು ಶ್ರೀಮಂಗಲ ಬಳಿಯ ಟಿ.ಶೆಟ್ಟಿಗೇರಿ ನಿವಾಸಿ ಚಟ್ಟಂಗಡ ಪ್ರತಾಪ್‌ ಎಂಬವರು ಗೋಣಿಕೊಪ್ಪದ ಪರಿಮಳ ಮಂಗಳ ವಿಹಾರ ಕಲ್ಯಾಣ ಮಂಟಪದಲ್ಲಿ ಮದುವೆ ಸಮಾರಂಭ  ಮುಗಿಸಿಕೊಂಡು ರಸ್ತೆಯಲ್ಲಿ ಹೋಗುತ್ತಿರುವಾಗ ಗೋಣಿಕೊಪ್ಪ ಕಡೆಯಿಂದ ಕೆಎ-12-ಕ್ಯು-2467ರ ಮೋಟಾರು ಸೈಕಲನ್ನು ಅದರ ಚಾಲಕ ಅತಿ ವೇಗ ಮತ್ತು ಅಜಾಗರೂಕತೆಯಿಂದ ಚಾಲಿಸಿಕೊಂಡು ಬಂದು ಪ್ರತಾಪ್‌ರವರಿಗೆ ಡಿಕ್ಕಿಪಡಿಸಿದ ಪರಿಣಾಮ ಪ್ರತಾಪ್‌ರವರಿಗೆ ಗಾಯಗಳಾಗಿರುವುದಾಗಿ ನೀಡಿದ ದೂರಿನ ಮೇರೆಗೆ ಗೋಣಿಕೊಪ್ಪ ಪೊಲೀಸರು ಪ್ರಕರಣ ದಾಖಲಿಸಿ ತನಿಖೆ ಕೈಗೊಂಡಿದ್ದಾರೆ.

ಬೈಕಿಗೆ ಕಾರು ಡಿಕ್ಕಿ
                   ದಿನಾಂಕ 11/03/2017ರಂದು ಕುಟ್ಟ ಬಳಿಯ ಕೋತೂರು ನಿವಾಸಿ ವಿ.ಕೆ.ಪ್ರದೀಪ ಎಂಬವರು ಕೆಎ-12-ಕೆ-9347ರ ಮೋಟಾರು ಬೈಕಿನಲ್ಲಿ ಹರಿಹರ ಕಡೆಗೆ ಹೋಗುತ್ತಿರುವಾಗ ಎದುರುಗಡೆಯಿಂದ ಕೆಎ-03-ಎಂಜೆ-9160ರ ಮಾರುತಿ ಓಮಿನಿ  ವ್ಯಾನನ್ನು ಅದರ ಚಾಲಕ ಮಹಾದೇವ ಎಂಬವರು ಅತಿ ವೇಗ ಮತ್ತು ಅಜಾಗರೂಕತೆಯಿಂದ ಚಾಲಿಸಿಕೊಂಡು ಬಂದು ಪ್ರದೀಪನು ಚಾಲಿಸುತ್ತಿದ್ದ ಬೈಕಿಗೆ ಡಿಕ್ಕಿ ಪಡಿಸಿದ ಪರಿಣಾಮ ಪ್ರದೀಪನಿಗೆ ಗಾಯಗಳಾಗಿರುವುದಾಗಿ ನೀಡಿದ ದೂರಿನ ಮೇರೆಗೆ ಕುಟ್ಟ ಪೊಲೀಸರು ಪ್ರಕರಣ ದಾಖಲಿಸಿ ತನಿಖೆ ಕೈಗೊಂಡಿದ್ದಾರೆ.

ವ್ಯಕ್ತಿಯ ಮೇಲೆ ಹಲ್ಲೆ
                  ದಿನಾಂಕ 11/03/2017ರಂದು ಕಾಲೂರು ಗ್ರಾಮದ  ಮಾಂದಲಪಟ್ಟಿ ನಿವಾಸಿ ಟಿ.ಪಿ.ನಂಜುಂಡ ಎಂಬವರು  ಮಾಂದಲಪಟ್ಟಿಯಲ್ಲಿ ಅವರ ಅಂಗಡಿಯಲ್ಲಿ ವ್ಯಾಪಾರ ಮಾಡುತ್ತಿರುವಾಗ ಅಲ್ಲಿಗೆ ಬಂದ ಹಚ್ಚಿನಾಡು ಗ್ರಾಮ ಟಿ.ಡಿ.ಬಿದ್ದಪ್ಪ, ಟಿ.ಎಲ್.ಈರಪ್ಪ, ಟಿ.ಎಲ್‌.ವಿಠಲ, ಟಿ.ಎ.ಉಮೇಶ, ಚೆನ್ನಪಂಡ ಗಿರೀಶ, ಬೊಟ್ಟೋಳಂಡ ಕಾರ್ಯಪ್ಪ, ಬಾರಿಬೆಳ್ಳಚ್ಚು ಗ್ರಾಮದ ಪೊನ್ನಚೆಟ್ಟಿರ ಪೊನ್ನಪ್ಪ ಮತ್ತು ಬೊಟ್ಟೋಳಂಡ ಮೊಣ್ಣಪ್ಪ ಎಂಬವರು ಅಂಗಡಿಗೆ ಅಕ್ರಮವಾಗಿ  ಪ್ರವೇಶಿಸಿ ಹಫ್ತಾ ಹಣ ನೀಡುವಂತೆ ಒತ್ತಾಯಿಸಿ ನಂಜುಂಡರವರ ಮೇಲೆ ಕಲ್ಲು ಮತ್ತು ದೊಣ್ಣೆಯಿಂದ ಹಲ್ಲೆ ಮಾಡಿರುವುದಾಗಿ ನೀಡಿದ ದೂರಿನ ಮೇರೆಗೆ ಮಡಿಕೇರಿ ಗ್ರಾಮಾಂತರ ಪೊಲೀಸರು ಪ್ರಕರಣ ದಾಖಲಿಸಿ ತನಿಖೆ ಕೈಗೊಂಡಿದ್ದಾರೆ.