Sunday, March 12, 2017

ಹಳೇ ವೈಷಮ್ಯ ವ್ಯಕ್ತಿಯ ಮೇಲೆ ಹಲ್ಲೆ

                        ಹಳೇ ವೈಷಮ್ಯದಿಂದ ವ್ಯಕ್ತಿಯ ಮೇಲೆ ಹಲ್ಲೆ ನಡೆಸಿ ಗಾಯ ಪಡಿಸಿದ ಘಟನೆ ಮಡಿಕೇರಿ ತಾಲೂಕಿನ ಮಕ್ಕಂದೂರು ಎಂಬಲ್ಲಿ ವರದಿಯಾಗಿದೆ. ದಿನಾಂಕ 10-3-2017 ರಂದು ಮಕ್ಕಂದೂರು ಗ್ರಾಮದ ನಿವಾಸಿ ವಿಜು ಎಂಬುವವರು ರಾತ್ರಿ ಮನೆಯಲ್ಲಿರುವಾಗ ಕೆ ನಿಡುಗಣೆ ಗ್ರಾಮದ ನಿವಾಸಿಯಾದ ಕಾಶಿ @ ಕಾವೇರಪ್ಪನವರು ಮೊಬೈಲ್ ಗೆ ಕರೆ ಮಾಡಿ ಮಕ್ಕಂದೂರು ದೇವಸ್ಥಾನದ ಹತ್ತಿರ ಬರಲು ತಿಳಿಸಿದ ಮೇರೆಗೆ ದೇವಸ್ಥಾನದ ಹತ್ತಿರ ಹೋದಾಗ ಕಾಶಿ @ ಕಾವೇರಪ್ಪನವರೊಂದಿಗೆ ಕೆ ನಿಡುಗಣೆ ಗ್ರಾಮದ ಅಚ್ಚಯ್ಯ ಹಾಗೂ ಚಂದನ್ ರವರು ಸಹಾ ಇದ್ದು ಸದ್ರಿಯವರು ಹಳೇ ವೈಷಮ್ಯದಿಂದ ಏಕಾ ಏಕಿ ವಿಜುರವರ ಮೇಲೆ ಹಲ್ಲೆ ನಡೆಸಿ ಗಾಯಪಡಿಸಿದ್ದು ಈ ಬಗ್ಗೆ ಮಡಿಕೇರಿ ಗ್ರಾಮಾಂತರ ಠಾಣೆಯಲ್ಲಿ ಪ್ರಕರಣ ದಾಖಲಾಗಿರುತ್ತದೆ.

ಕ್ಷುಲ್ಲಕ ಕಾರಣಕ್ಕೆ ವ್ಯಕ್ತಿಯ ಮೇಲೆ ಹಲ್ಲೆ
                        ಮಡಿಕೇರಿ ನಗರದ ನಿವಾಸಿ ಅಭಿಲಾಶ್ ಎಂಬುವವರು ದಿನಾಂಕ 10-3-2017 ರಂದು ರಾತ್ರಿ ಗ್ರೀನ್ ಲ್ಯಾಂಡ್ ಹೊಟೆಲ್ ಗೆ ಹೋಗುತ್ತಿರುವಾಗ ಅಲ್ಲೇ ಪಕ್ಕದ ಟೂರಿಸ್ಟ್ ಲಾಡ್ಜ್ ನ ಮುಂದೆ ಸ್ನೇಹಿತ ನಿತಿನ್ ರವರೊಂದಿಗೆ ಭಗವತಿ ನಗರದ ನಿವಾಸಿಗಲಾದ ಕಾಶಿಕಾವೇರಪ್ಪ, ಚಂದನ್ ಮತ್ತು ನೀಲಾಧರರವರು ಗಲಾಟೆ ಮಾಡುತ್ತಿದ್ದುದ್ದನ್ನು ಕಂಡು ಏಕೆ ಗಲಾಟೆ ಮಾಡುತ್ತಿದ್ದೀರಾ ಎಂದು ಕೇಳಿದಾಗ ಮೂವರೂ ಸೇರಿ ಅಭಿಲಾಶ್ ರವರ ಮೇಲೆ ಹಲ್ಲೆ ನಡಸಿದ್ದು ಈ ಬಗ್ಗೆ ಮಡಿಕೇರಿ ನಗರ ಠಾಣೆಯಲ್ಲಿ ಪ್ರಕರಣ ದಾಖಲಾಗಿರುತ್ತದೆ.

ಮಹಿಳೆಯನ್ನು ವಂಚಿಸಿ ಸರ ಅಪಹರಣ
                        ಶನಿವಾರಸಂತೆಯ ಕೂಗೂರು ಗ್ರಾಮದ ನಿವಾಸಿಯಾದ ಲೀಲಾವತಿಯವರು ದಿನಾಂಕ 11-3-2017ರಂದು ಕೆ.ಆರ್.ಸಿ ಸರ್ಕಲ್ ನಿಂದ ಶನಿವಾರಸಂತೆಯ ಮಾರ್ಕೆಟ್ ರಸ್ತೆಯಲ್ಲಿ ನಡೆದುಕೊಂಢು ಹೋಗುತ್ತಿದ್ದಾಗ ಓರ್ವ ಅಪರಿಚಿತ ಹೆಂಗಸು ಲೀಲಾವತಿಯವರನ್ನು ಮಾತನಾಡಿಸಿ ನನಗೆ ಚಿನ್ನ ಸಿಕ್ಕಿದೆ, ಅದನ್ನು ನೋಡುತ್ತೀರಾ ಎಂದು ಹೇಳಿ ಮಾತನಾಡಿಸುತ್ತಿದ್ದಾಗ ಅಲ್ಲಿಗೆ ಒಬ್ಬ ಅಪರಿಚಿತ ಗಂಡಸು ಬಂದು ಆಕೆಯನ್ನು ಮಾತನಾಡಿಸಿ ನಾನು ಚಿನ್ನ ತೆಗೆದುಕೊಳ್ಳುತ್ತೇನೆ. ಇಲ್ಲಿ ಮಾತನಾಡುವುದು ಬೇಡ, ಸೈಡಿಗೆ ಹೋಗೋಣ ಎಂದು ಹೇಳಿ ಇಬ್ಬರನ್ನು ಪ್ರವಾಸ ಮಂದಿರದ ಬಳಿ ಕರೆದುಕೊಂಡು ಹೋಗಿ ಹೆಂಗಸಿದ ಬಳಿ ಇದ್ದ 2 ಚಿನ್ನದಂತಹ ಮಾಂಗಲ್ಯ ಕರಿ ಮಣಿ ಸರ ಹಾಗೂ ಕಾಸನ್ನು ಪೋಣಿಸಿರುವ ಸರವನ್ನು ತೆಗೆದು ತೋರಿಸಿ ಇದರ ಬೆಲೆ 1,50,000 ರೂ ಆಗುತ್ತದೆ ಎಂದು ಹೇಳಿ ಕೈಯ್ಯಲ್ಲಿದ್ದ ಸರವನ್ನು ಕಲ್ಲಿಗೆ ಉಜ್ಜಿ ಇದು ಶುದ್ದ ಚಿನ್ನ, ನೋಡಿ ಎಂದು ಹೇಳಿ ತೋರಿಸಿ ಲೀಲಾವತಿಯವರ ಕುತ್ತಿಗೆಯಲ್ಲಿದ್ದ ಮಾಂಗಲ್ಯ ಸರವನ್ನು ಕೇಳಿದಾಗ ಬಿಚ್ಚಿ ಆಕೆಯ ಕೈಗೆ ಕೊಟ್ಟಾಗ ಆಕೆ ಅದನ್ನು ಉಜ್ಜಿ ಇದು ತುಂಬಾ ಕಮ್ಮಿ ಕ್ಯಾರೆಟಿನ ಚಿನ್ನ ಎಂದು ಹೇಳಿ ಲೀಲಾವತಿಯ ಬಳಿ ಇದ್ದ ಮಾಂಗಲ್ಯ ಸರವನ್ನು ಬದಲಿಸಿ ಹೆಂಗಸಿನ ಬಳಿ ಇದ್ದ ನಕಲಿ ಚಿನ್ನದ ಚೈನನ್ನು ನೀಡಿ ವಂಚಿಸಿರುವುದಾಗಿ ಲೀಲಾವತಿಯವರು ನೀಡಿದ ದೂರಿನ ಮೇರೆಗೆ ಶನಿವಾರಸಂತೆ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿರುತ್ತದೆ.

ಅಪಘಾತ ಪ್ರಕರಣ
                         ಮಡಿಕೇರಿ ನಗರದ ಜಲಾಶ್ರಯ ಬಡಾವಣೆಯ ನಿವಾಸಿ ಅನಂತ ಕೃಷ್ಣ ಎಂಬುವವರು ಬಾವ ಸುಶೀಲ್ ಕುಮಾರ್ ರವರೊಂದಿಗೆ ಅರಂತೋಡುವಿನ ತೊಡಿಕಾನ ದೇವಸ್ಥಾನಕ್ಕೆ ಹೋಗಿ ಬರುತ್ತಿರುವಾಗ ಜೋಡುಪಾಲ ಎಂಬಲ್ಲಿಗೆ ತಲುಪುವಾಗ ಮುಂದಿನಿಂದ ಬಂದ ಕೆಎಲ್ -14-ಹೆಚ್- 5154 ರ ಇನ್ನೋವಾ ಕಾರನ್ನು ಚಾಲಕ ಅಜಾಗರೂಕತೆಯಿಂದ ಚಾಲನೆ ಮಾಡಿಕೊಂಡು ಹೋಗಿ ಕಾರಿಗೆ ಡಿಕ್ಕಿ ಪಡಿಸಿ ಕಾರು ಜಖಂ ಗೊಂಡಿದ್ದು, ಚಾಲಕ ಫಕೀರಪ್ಪನವರಿಗೆ ಗಾಯವಾಗಿದ್ದು, ಇನ್ನೋವಾ ಕಾರನ್ನು ಚಾಲಕ ಡಿಕ್ಕಿ ಪಡಿಸಿ ನಿಲ್ಲಿಸದೇ ಹೊರಟು ಹೋಗಿರುವುದಾಗಿ ಅನಂತ ಕೃಷ್ಣರವರು ನೀಡಿದ ದೂರಿನ ಮೇರೆಗೆ ಮಡಿಕೇರಿ ಗ್ರಾಮಾಂತರ ಠಾಣೆಯಲ್ಲಿ ಪ್ರಕರಣ ದಾಖಲಾಗಿರುತ್ತದೆ.