Wednesday, January 31, 2018

ಮಹಿಳೆಯ ಅಸಹಜ ಸಾವು, ಪ್ರಕರಣ ದಾಖಲು:

     ಪೊನ್ನಂಪೇಟೆ ಪೊಲೀಸ್ ಠಾಣಾ ಸರಹದ್ದಿನ ದೇವಮಚ್ಚಿ ಗ್ರಾಮದ ನಿವಾಸಿ ಮುತ್ತು ಎಂಬವರು ದಿನಾಂಕ 29-1-2018 ರಂದು ಬೆಳಿಗ್ಗೆ 10-00 ಗಂಟೆ ಸಮಯದಲ್ಲಿ ಸ್ನಾನದ ಕೋಣೆಗೆ ಹೋಗಿದ್ದು ಹೊರಗೆ ಬಂದು ನರಳಾಡುತ್ತಿದ್ದು, ಆಕೆಯನ್ನು ಚಿಕಿತ್ಸೆಗಾಗಿ ಗೋಣಿಕೊಪ್ಪ ಆಸ್ಪತ್ರೆಗೆ ದಾಖಲಿಸಿ ಹೆಚ್ಚಿನ ಚಿಕಿತ್ಸೆ ಬಗ್ಗೆ ಮಡಿಕೇರಿ ಜಿಲ್ಲಾ ಆಸ್ಪತ್ರೆಗೆ ದಾಖಲಿಸಿದ್ದು ಚಿಕಿತ್ಸೆ ಫಲಕಾರಿಯಾಗದೆ ಸದರಿ ಮುತ್ತುರವರು ಸಾವನಪ್ಪಿದ್ದು, ಈ ಸಂಬಂಧ ಮೃತರ ತಾಯಿ ಜೇನುಕುರುಬರ ಮಲ್ಲಿಗೆಯವರು ನೀಡಿದ ದೂರಿನ ಮೇರೆಗೆ ಪೊನ್ನಂಪೇಟೆ ಪೊಲೀಸರು ಪ್ರಕರಣ ದಾಖಲಿಸಿ ಮುಂದಿನ ಕ್ರಮ ಕೈಗೊಂಡಿದ್ದಾರೆ.

ನೇಣುಬಿಗಿದುಕೊಂಡು ವ್ಯಕ್ತಿ ಆತ್ಮಹತ್ಯೆ:

     ದಕ್ಷಿಣ ಕನ್ನಡ ಜಿಲ್ಲೆಯ ಸುಳ್ಯ ತಾಲೋಕು ಅಜ್ಜವರ ಗ್ರಾಮದ ನಿವಾಸಿ ಟಿ. ರಾಧಕೃಷ್ಣ ಎಂಬವರ ಅಣ್ಣ ದಿವಾಕರ ರವರು ದಿನಾಂಕ 26-1-2018 ರಂದು ಕಾಣೆಯಾಗಿದ್ದು ಮಡಿಕೇರಿ ಗ್ರಾಮಾಂತರ ಠಾಣೆಯಲ್ಲಿ ಪ್ರಕರಣ ದಾಖಲಾಗಿರುತ್ತದೆ. ದಿನಾಂಕ 30-1-2018 ರಂದು ಫಿರ್ಯಾದಿ ಟಿ. ರಾಧಾಕೃಷ್ಣ ಹಾಗು ಕೆಲಸದವರು ದಿವಾಕರರವರನ್ನು ಹುಡುಕುತ್ತಿದ್ದಾಗ ಅಪ್ಪಂಗಳ ಗ್ರಾಮದ ರಾಮಚಂದ್ರ ಎಂಬವರ ಕಾಫಿ ತೋಟದಲ್ಲಿ ಸದರಿ ದಿವಾಕರರವರು ಮರವೊಂದಕ್ಕೆ ನೈಲಾನ್ ಅಗ್ಗವನ್ನು ಬಳಸಿ ನೇಣು ಹಾಕಿಕೊಂಡು ಮೃತಪಟ್ಟಿರುವುದು ಕಂಡು ಬಂದಿದ್ದು, ಮಡಿಕೇರಿ ಗ್ರಾಮಾಂತರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಿಸಿದ ಪೊಲೀಸರು ಮುಂದಿನ ಕ್ರಮ ಜರುಗಿಸಿದ್ದಾರೆ.

ಲಾರಿ ಅಪಘಾತ ವ್ಯಕ್ತಿ ದುರ್ಮರಣ:

    ಮಡಿಕೇರಿ ತಾಲೋಕು ಮದೆನಾಡು ಗ್ರಾಮದ ಒ.ಇ. ಉತ್ತಪ್ಪ ಎಂಬವರು ತ್ರಿವಿಕ್ ಹೊಟೇಲ್ ಮತ್ತು ರೆಸಾರ್ಟ್ ನಲ್ಲಿ ವ್ಯವಸ್ಥಾಪಕನಾಗಿ ಕೆಲಸ ನಿರ್ವಹಿಸಿಕೊಂಡಿದ್ದು ದಿನಾಂಕ 30-1-2018 ರಂದು ಬೆಳಗಿನ ಜಾವ 3.30 ಗಂಟೆಯಲ್ಲಿ ಕಟ್ಟಡ ನಿರ್ಮಾಣಕ್ಕೆ ಸೀಮೆಂಟನ್ನು ಲಾರಿಯಲ್ಲಿ ತುಂಬಿಸಿಕೊಂಡು ಬಂದಿದ್ದು ಸದರಿ ಸಿಮೆಂಟ್ ನ್ನು ಇಳಿಸುವ ಸಂಬಂಧ ಲಾರಿಯನ್ನು ಅದರ ಚಾಲಕ ಹಿಂದಕ್ಕೆ ಚಾಲಿಸಿದ್ದು ಲಾರಿಯ ಹಿಂದೆ ನಿಂತಿದ್ದ ಕುಲ್ದೀಪ್ ಎಂಬ ವ್ಯಕ್ತಿಗೆ ಲಾರಿ ಡಿಕ್ಕಿಯಾಗಿ ಗಂಭೀರವಾಗಿ ಗಾಯಗೊಂಡಿದ್ದು ಅವರನ್ನು ಚಿಕಿತ್ಸೆಗಾಗಿ ಮೈಸೂರಿಗೆ ಸಾಗಿಸಿದ್ದು ಚಿಕಿತ್ಸೆ ಫಲಕಾರಿಯಾಗದೆ ಅವರು ಸದರಿ ಕಲ್ದೀಪ್ ಮೃತಪಟ್ಟಿದ್ದು ಮಡಿಕೇರಿ ಗ್ರಾಮಾಂತರ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

ಪಾದಚಾರಿ ಮಹಿಳೆಗೆ ವ್ಯಾನ್ ಡಿಕ್ಕಿ:

    ದಿನಾಂಕ 30-01-2018 ರಂದು ಸಮಯ ಸುಮಾರು 05.00 ಪಿಎಂಗೆ ಕುಶಾಲನಗರ ಬಳಿಯ ಸೀಗೆಹೊಸೂರು ಗ್ರಾಮದ ನಿವಾಸಿ ಫಿರ್ಯಾದಿ ನಾಗರಾಜು ಮತ್ತು ಅವರ ಅಕ್ಕ ಸರೋಜಮ್ಮನವರು ಮಾದಪಟ್ಟಣದ ಅವರ ನೆಂಟರ ಮನೆಗೆ ಹೋಗಿ ವಾಪಸ್ಸು ನಲ್ಲೂರಿಗೆ ಹೋಗಲು ಮಾದಪಟ್ಟಣ ಪಾಲಿಟೆಕ್ನಿಕ್‌ ಜಂಕ್ಷನ್‌ನ ರಸ್ತೆ ಬಳಿ ನಿಂತಿರುವಾಗ್ಗೆ ಮಡಿಕೇರಿ ಕಡೆಯಿಂದ ಬಂದ ಕೆ ಎ 55 ಎಂ 2159 ರ ಓಮಿನಿ ವ್ಯಾನಿನ ಚಾಲಕ ಅತಿವೇಗ ಮತ್ತು ಅಜಾಗರೂಕತೆಯಿಂದ ವ್ಯಾನನ್ನು ಚಾಲನೆ ಮಾಡಿಕೊಂಡು ಬಂದು ಡಿಕ್ಕಿಪಡಿಸಿದ ಪರಿಣಾಮ ಸರೋಜಮ್ಮನವರು ಬಿದ್ದು, ಅವರ ತಲೆ ಮತ್ತು ಕೈ ಕಾಲುಗಳಿಗೆ ರಕ್ತಗಾಯವಾಗಿದ್ದು, ತಕ್ಷಣ ಗಾಯಾಳನ್ನು ಕುಶಾಲನಗರ ಸರ್ಕಾರಿ ಆಸ್ಪತ್ರೆಗೆ ದಾಖಲಿಸಿ ವೈದ್ಯರ ಸಲಹೆ ಮೇರೆಗೆ ಹೆಚ್ಚಿನ ಚಿಕಿತ್ಸೆ ಬಗ್ಗೆ ಮೈಸೂರಿಗೆ ಸಾಗಿಸಲಾಗಿದ್ದು, ಕುಶಾಲನಗರ ಸಂಚಾರಿ ಠಾಣೆಯಲ್ಲಿ ಪ್ರಕರಣ ದಾಖಲಿಸಿದ ಪೊಲೀಸರು ತನಿಖೆ ಕೈಗೊಂಡಿದ್ದಾರೆ.