Thursday, June 7, 2018

ಅಸಹಜ ಸಾವು ಪ್ರಕರಣ ದಾಖಲು:
     ಅನಾರೋಗ್ಯದಿಂದ ಬಳಲುತ್ತಿದ್ದ ವ್ಯಕ್ತಿಯೊಬ್ಬರು ಹೆಚ್ಚಿನ ಮಾತ್ರೆ ಸೇವಿಸಿದ ಪರಿಣಾಮ ಸಾವನಪ್ಪಿದ ಘಟನೆ ಮಡಿಕೇರಿ ತಾಲೋಕು ಕುಂಜಿಲ ಗ್ರಾಮದಲ್ಲಿ ನಡೆದಿದೆ.  ಕುಂಜಿಲ ಗ್ರಾಮದ ಕುಂಡಂಡ ಆಮು ಎಂಬವರ ಮಗ 27 ವರ್ಷ ಪ್ರಾಯದ ಸಂಷುದ್ದೀನ್ ಎಂಬವರು ಮೂರ್ಛೆರೋಗದಿಂದ ಬಳಲುತ್ತಿದ್ದು ದಿನಾಂಕ 1-6-2018 ರಂದು ಸದರಿ ಸಂಷುದ್ದೀನ್ ರವರು ಅಗತ್ಯಕ್ಕಿಂತ ಹೆಚ್ಚಿನ ಮಾತ್ರೆಗಳನ್ನು ಸೇವಿಸಿದ ಪರಿಣಾಮ ತೀವ್ರವಾಗಿ ಅಸ್ವಸ್ಥಗೊಂಡು,  ಅವರನ್ನು ಆಸ್ಪತ್ರೆಗೆ ದಾಖಲಿಸಲಾಗಿ, ಚಿಕಿತ್ಸೆ ಫಲಕಾರಿಯಾಗದೆ ದಿನಾಂಕ 6-6-2018 ರಂದು ಸದರಿಯವರು ಮೃತಪಟ್ಟಿದ್ದು, ನಾಪೋಕ್ಲು ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
ಎ.ಟಿ.ಎಂ. ಕಾರ್ಡ್ ಬದಲಿಸಿ ವಂಚನೆ:
     ಮಡಿಕೇರಿ ತಾಲೋಕು ಬಿಳಿಗೇರಿ ಗ್ರಾಮದ ನಿವಾಸಿ ಕೆ.ಯು. ಲೋಕೇಶ್ ಎಂಬವರು ದಿನಾಂಕ 31-5-2018 ರಂದು ತಮ್ಮ ಬಾಪ್ತು ಕೆನರಾ ಬ್ಯಾಂಕ್ ಎ.ಟಿ.ಎಂ. ಕಾರ್ಡ್ ನಿಂದ ಮಡಿಕೇರಿ ನಗರದ ಬಸ್ಸು ನಿಲ್ದಾಣ ಬಳಿ ಇರುವ ವಿಜಯಾ ಬ್ಯಾಂಕ್ ಎ.ಟಿ.ಎಂ. ಗೆ ಹೋಗಿ ಅಲ್ಲಿದ್ದ ವ್ಯಕ್ತಿಯೊಬ್ಬರಿಂದ ರೂ.10,000/- ಹಣವನ್ನು ತೆಗೆಸಿದ್ದು, ಸದರಿ ವ್ಯಕ್ತಿ ಹಣವನ್ನು ಎ.ಟಿ.ಎಂ. ನಿಂದ ತೆಗೆದುಕೊಟ್ಟು ಬದಲಿ ಎ,ಟಿ.ಎಂ. ಕಾರ್ಡ್ ನ್ನು ನೀಡಿ ಅಲ್ಲಿಂದ ತೆರಳಿದ್ದು, ದಿನಾಂಕ 4-6-2018 ರಂದು ಫಿರ್ಯಾದಿ ಲೋಕೇಶ್ ನವರು ಬ್ಯಾಂಕಿನಲ್ಲಿ ಪರಿಶೀಲಿಸಿದಾಗ ತನ್ನ ಬ್ಯಾಂಕ್ ಖಾತೆಯಿಂದ 1,90,000/- ಹಣವನ್ನು ಡ್ರಾ ಮಾಡಿ ವಂಚಿಸಿರುವುದು ತಿಳಿದುಬಂದಿದ್ದು, ಈ ಸಂಬಂಧ ಮಡಿಕೇರಿ ನಗರ ಠಾಣೆಯಲ್ಲಿ ಪ್ರಕರಣ ದಾಖಲಿಸಿದ್ದಾರೆ.
ಮಹಿಳೆಗೆ ಕಾರು ಡಿಕ್ಕಿ:
     ಸಿದ್ದಾಪುರ ಪೊಲೀಸ್ ಠಾಣಾ ಸರಹದ್ದಿನ ಸಿದ್ದಾಪುರ ಅಂಬೇಡ್ಕರ್ ನಗದಲ್ಲಿ ನೆಲೆಸಿರುವ ಹೆಚ್.ಎಸ್. ಅಯ್ಯ ಎಂಬವರ ಪತ್ನಿ ಶ‍್ರೀಮತಿ ರಾಜೇಶ್ವರಿ ಎಂಬವರು ದಿನಾಂಕ 1-6-2018 ರಂದು ಸಂಜೆ 8-45 ಗಂಟೆ ಸಮಯದಲ್ಲಿ ತಮ್ಮ ಮನೆಯ ಪಕ್ಕದ ಮಿನಿ ವಾಟರ್ ಟ್ಯಾಂಕ್ ನಿಂದ ನೀರು ತರುತ್ತಿರುವಾಗೆ ವ್ಯಕ್ತಿಯೊಬ್ಬರು ಕಾರನ್ನು ಅತೀ ವೇಗ ಮತ್ತು ಅಜಾಗರೂಕತೆಯಿಂದ ಚಲಾಯಿಸಿಕೊಂಡು ಬಂದು ರಾಜೇಶ್ವರಿರವರಿಗೆ ಡಿಕ್ಕಿಪಡಿಸಿದ ಪರಿಣಾಮ ಸದರಿ ರಾಜೇಶ್ವರಿರವರು ರಸ್ತೆಯ ಮೇಲೆ ಬಿದ್ದು ಗಾಯಗೊಂಡಿದ್ದು, ಕಾರಿನ ಚಾಲಕ ಘಟನೆ ಬಳಿಕ ಕಾರನ್ನು ನಿಲ್ಲಿಸದೇ ಹೋಗಿದ್ದು, ಈ ಸಂಬಂಧ ಹೆಚ್‍.ಎಸ್. ಅಯ್ಯರವರು ನೀಡಿದ ದೂರಿನ ಮೇರೆಗೆ ಸಿದ್ದಾಪುರ ಠಾಣೆಯಲ್ಲಿ ಪ್ರಕರಣ ದಾಖಲಿಸಿದ ಪೊಲೀಸರು ತನಿಖೆ ಕೈಗೊಂಡಿದ್ದಾರೆ.
ಮನೆಕಳವು:
     ಕುಶಾಲನಗರದ ಬಸವೇಶ್ವರ ಬಡಾವಣೆ ನಿವಾಸಿ ಎನ್.ಈ. ನಾಗೇಶ್ ರವರು ತಮ್ಮ ಪತ್ನಿಯೊಂದಿಗೆ ದಿನಾಂಕ 3-6-2018 ರಂದು ಬೆಂಗಳೂರಿಗೆ ಹೋಗಿದ್ದು, ಅವರ ತಮ್ಮನನ್ನು ಮನೆ ನೋಡಿಕೊಳ್ಳಲು ತಿಳಿಸಿ ಹೋಗಿದ್ದು ದಿನಾಂಕ 5-6-2018 ರಂದು ರಾತ್ರಿ ಯಾರೋ ಕಳ್ಳರು ಮನೆಯ ಮುಂದಿನ ಕಿಟಕಿಯ ಸರಳುಗಳನ್ನು ಮುರಿದು ಮನೆಯ ಒಳಗಡೆ ಪ್ರವೇಶ ಮಾಡಿ ಬೀರುವಿನಲ್ಲಿಟ್ಟಿದ್ದ ಪರ್ಸ್ ನ್ನು ತೆಗೆದು ಅದರಲ್ಲಿಟ್ಟಿದ್ದ  ಎ.ಟಿ.ಎಂ. ಕಾರ್ಡ್ ಮತ್ತು ಎ.ಟಿ.ಎಂ. ಪಿನ್ ನಂಬರ್ ನ್ನು ಕಳವು ಮಾಡಿಕೊಂಡು ಹೋಗಿದ್ದು, ಈ ಸಂಬಂಧ ಕುಶಾಲನಗರ ಪಟ್ಟಣ ಠಾಣೆಯಲ್ಲಿ ಪ್ರಕರಣ ದಾಖಲಿಸಿದ ಪೊಲೀಸರು ತನಿಖೆ ಕೈಗೊಂಡಿದ್ದಾರೆ.